Kai Htik gumshem Myen hpyen dap hpe KIA ni gasat zing la

KIA Masat (3) Dap Ba, Masat (27) Dap Dung ginra, Kai Htik mare kaw dap jung nga ai gumshem Myen hpyen dap hpe KIA ni gasat zing la lu sai lam na chye lu ai.

Manje hte Manwin lapran Kai Htik gumshem Myen hpyen dap Hk.L.Y (102) hpe KIA pawng hpawm hpyen hpung ni January shata 28 ya shani kaw na htim gasat ai hta January shata 29 ya jahpawt hkying 9:30am aten daram hta zep zi gasat zing la lu sai lam, shawnglam lit nga ai salang ni kaw na chye lu ai.

Kai Htik gumshem Myen hpyen dap gaw Kai Htik ginra hta kaba dik ai hpyen dap rai nna, Manwin gumshem Myen hpyen dap hpe gasat zing la ngut ai hpang Kai Htik hpyen dap hpe bai htim gasat wa ai re lam chye lu ai.