Kamaing hte Nam Ya lapran gasat gala majan byin nga
Hpakant ginra, Kamaing hte Nam Ya lapran kaw gasat gala majan byin nga ai lam chye lu ai.
June shata 24 ya jahpawt hkying 6:00am aten daram kaw nna, Kamaing hte Nam Ya lapran Um kahtawng kaw KIA hte gumshem Myen hpyen dap ni gasat gala majan byin nga ai lam, shawnglam lit nga ai salang ni kaw na chye lu ai.
Kamaing Byuha kawng kaw na pru wa ai gumshem Myen hpyen dap hte P.T.Ts pawng hpawm hpyen hpung n-gun (80) daram gaw, Kamaing hte Nam Ya lapran kaw dap jung shara jahkrat na matu, hpyen shamu shamawt wa ai majaw, gasat gala majan byin wa ai re lam chye lu ai.
Gumshem Myen hpyen dap pawng hpawm hpyen hpung ni gaw, ya aten Um kahtawng kaw du nga sai hte lahkawng maga hpyen masa shaja hkat nga ding yang re ai lam chye lu ai.
Kamaing hte Hpakant lam hta laiwa sai May shata 24 ya shani kaw nna, gumshem Myen hpyen dap pawng hpawm hpyen hpung ni hte KIA ni gasat gala majan byin ai kaw nna, dai ginra na mungshawa ni ya aten du hkra hpyen koi yen nga ra ai re lam chye lu ai.
