Kanpaiti ginra hpe KIA zing madu
Kanpaiti ginra hpe KIA ni gasat zing madu la lu sai lam chye lu ai.
November shata 20 ya shana daw hkying 5:00pm aten daram hta Kanpaiti ginra hpe KIA pawng hpawm hpyen hpung ni gasat zing madu la lu sai lam, lit nga ai salang ni kaw na chye lu ai.
KIA pawng hpawm hpyen hpung ni hte gumshem Myen hpyen dap ni dai hpawt hkying 9:30am aten daram kaw, ang katut gasat gala majan shawng byin hpang wa ai kaw nna, Kanpaiti makau grup yin ni hta gasat gala majan matut manoi byin nga ai hta dai na maga hkying 5:00pm aten daram hta zing madu la lu sai lam chye lu ai.
Kanpaiti gaw Salang. Zahkung Ting Ying a uphkang ginra langai rai nna, Jinghpaw mung hte Miwa mung jarit kun rai htaw shalai ginlen nga ai Muklum langai mung rai nga ai.
Matut nna KIA Masat (1) Dap Ba ginra de gumshem Myen hpyen dap ni dai ni nbungli hte wa gap gasat ai lam ni galaw ai rai nna, Nmawk ginra de mung, gumshem Myen hpyen dap ni hpyen n-gun matut htu shadut nga ai majaw, KIA hte gasat gala majan matut byin nga ai lam chye lu ai.
