Kanpaiti ginra hpyen laja lana rim lahkawn nga

Kanpaiti ginra hta gumshem Myen hpyen dap n-pu, P.T.Ts hpung ni mare kata hpyen laja lana rim lahkawn nga ai lam chye lu ai.

October shata praw kaw nna, Kanpaiti ginra hta shamu shamawt nga ai, P.T.Ts hpyen hpung ni, nta langai kaw na marai langai hpyenla n galaw nmai ngu ai ga baw hte hpyen laja lana rim lahkawn nga ai lam, ginra masha ni kaw na chye lu ai.

P.T.Ts hpyen hpung ni gaw mare kata na la wa ngan asak ram ai ramma ni hpe rim lahkawn ai sha n-ga mare lawk nta, lu sha seng hkan du hkra shang rim lahkawn nga ai lam chye lu ai.

Ndai zawn hpyen laja lana rim lahkawm nga ai lam gaw, gumshem Myen hpyen dap maga de hpyen n-gun jat bang ya lu na matu rim lahkawn ai re lam chye lu ai.

P.T.Ts hpung ni hpyen laja lana rim lahkawn nga ai majaw, dai ginra na mungshawa ni hkrit tsang na nga ra ai hte Myitkyina, Kanpaiti lam hkawmsa hkawmwa mungshawa ni mung, shadi maja let hkawmsa nga ai lam matut chye lu ai.