Kanu Kawa hpe masat shagrau ai gawdin ginsup lamang galaw
Manmaw Saradaw Ginwang sasana, Laiza Jau Ginwang ni a Kanu Kawa hpe masat shagrau ai gawdin ginsup lamang hpe July shata 27 ya shana maga hkying 2:00pm aten kaw nna hkying 6:30pm aten du hkra, Laiza Muklum Zup Awng Simsa Gawdin Pa hta galaw ai lam chye lu ai.
Ndai gawdin ginsup lamang hpe Laiza Jau Ginwang Catholic nawku hpung kaw nna woi awn galaw ai rai nna, Tara Hkaw Sara hpung, Kawa La sak kung hpung, Ramma shadang hpung hte Ramma Shayi hpung ngu nna wuhpung 4 garan nhtawm ginsup ai re.
Gawdin ginsup ai a yaw shada lam hpe Laiza Jau Ginwang Up Wa Jau Peter Lazum Tu Lum kaw nna tsun ai hta “Anhte tinang a Kanu Kawa ni hpe n gup n gau hku na chyeju dum ai lam nga ai, kumhpaw kumhpa ni hte shagrau ai lam nga ai, akyu hpyi ya ai hku nna chyeju dum ai chyeju htang ai lam galaw ai, naw nga ai Kanu Kawa nnga mat sai Kanu Kawa anhte a Kanu Kawa nraitim, chyeju jaw ya nna lam amyumyu hku bau maka zinlum ai hpe chyeju dum masat masa hku nna shawa masha yawng shanglawm ai hte shamu shamawt gawdin ginsup ai lam re” nga nna tsun ai.
Ginsup ai hpe daw lahkawng hku galaw ai, numdaw langai hku nna Tara hkaw sara hpung hte Ramma shadang hpung ni ginsup ai hta tara hkaw sara ni guo 3 ramma ni guo 5 hte dang mat ai. numdaw lahkawng lang hta gaw Sakkung Kawa La ni hte Ramma shayi ni ginsup ai hta Ramma shayi ni guo 2, Kawa La ni guo 6 hte ginsup dang mat ai.
Kanu Kawa poi ninghtoi hta ya na zawn gawdin ginsup ai lamang hpe, Laiza Jau Ginwang Up ningnan Wa Jau Perter Lazum Tu Lum hte Ningtau Ginwang Up Wa Jau Mahte Mwihpu Naw Grawng yan kaw nna ningmu jaw ai hte anhte mung htuk ai ngu nna shawng de rai n galaw yu ai hpe galaw ai re nga nna, Laiza Jau Ginwang a tara hkaw sara hpa-awn Sara Kaba Columban Lasang Tu San tsun dan ai.
Karai a Kanu rai nga ai Chyoipra ai Nu Mary a Kanu yan Kawa sanpra ai San Joachim yan San Anna poi masat ngu nna Catholic nawku hpung hta Mungkan ting jawm galaw nga ai re. Ninghtoi hku masat da ai gaw July shata 26 ya shani re lam chye lu ai.
