Kanu num langai bawm kabye kapaw la ai majaw asak si sum
Manmaw, N-mawk Maru Kahtawng mare makau kaw January shata 16 ya shani, amyu shayi kanu num langai hkam bawm kabye kapaw la ai majaw asak si sum mat ai lam buga masha ni shana wa ai kaw na chye lu ai.
Hkam bawm kabye kapaw la nna asak si sum mat ai kanu Num gaw Manmaw Lisu hpyen yen dabang kaw shanu nga ai Salang. Myitung Hka a ning-rum ningtau jan. Ma marai 7 a kanu Jan. Lasi Lu asak 48 ning rai nna, Maru mare makau na nam maling de Kana Jan. Lasi Hkawn, kaning Jan. Su San Na yan hte rau shat mai tam sa ai kaw bawm kabye kapaw la ai majaw asak si sum mat ai re lam chye lu ai.
Jan. Lasi Hkawn, Jan. Lasi Lu, Jan. Su San Na marai 3 gaw Maru kahtawng de tinang a yi, sun wa gawan let shat mai tam ai kaw marai 3 hte bawm kabyen kapaw la ai rai nna Jan.Lasi Lu gaw ningma grai sawng ai majaw bawm kapaw ai shara kaw nan asak si sum mat ai re hte hkam bawm gaw kadai kara uhpung ni hkam da ai bawm re hpe n chye ai lam buga masha ni tsun dan ai kaw na chye lu ai.
Maru Kahtawng mare gaw Zin Lum Bum grup yin na mare kahtawng langai rai nna, Myen Hpyen Dap hte ni ai shara re majaw Myen hpyen hpung ni shamu shamawt dap jung nga ai mare re lam chye lu ai.
Asuya hte NGO wuhpung ni kaw nna hpyen yen ni hpe dawm wa na matu lajang ai lam ni nga wa ai majaw, tinang a sun wang ni hpe wa gawan ai hta n-dai zawn mabyin ni grai law wa ai majaw hpyen yen ni hku nna mung tinang a buga ginra de wa na matu shim lum lam nnga ai majaw myit ru myit tsang nga ai lam, buga masha langai tsun dan ai.
Ya aten asak si sum mat ai Jan. Lasi Lu a moi mang hpe January shata 17 ya shani makoi mayang sai rai nna shi a kana hte kaning yan gaw Manmaw tsi rung de tsi tsi hkam la nga ai hta Kana Jan.Lasi Hkawn gaw ningma loi sawng ai majaw tsang ra ai madang re lam na chye lu ai.
