Kapmaw Rap ramma ningbaw ningla sharin hpawng galaw

Uru Sengmaw Ginwang kata na Kapmaw rap a ramma ningbaw ningla sharin hpawng hpe Kapmaw rap ramma komiti ni woi awn nhtawm May shata 16 ya shani manam zup nna, 19 ya shani manam bra, sharin ninghtoi 2 ya hte Chyahkrau buga kaw galaw ai lam chye lu ai.

Sharin sara ni gaw Sara Palawng Seng Myet Naw kaw nna, litla lithkam gwi ai ramma ngu ga baw hte sharin ya na, Uru Sengmaw Ginwang Ramma Hpu-Awn Sara Galau Kyang Bawm gaw, nanghpam hte ramma ngu ai ga baw hte special talk hku nna sharin ya na, Sara Zinghang Gam Htun kaw nna mung, free talk lak jet shang na re.

“Yaw shada lam gaw buga shagu de na ramma hpu-awn buga lithkam, lawk lithkam zawn re ningbaw ningla ni hpe atsam ningja shajat ya ai lam re” nga nna Kapmaw rap ramma ningbaw Sara Labang  Gum San tsun ai.

Sharin hpawng hta Senghpra buga, Nam Ya buga, Kapmaw Zup buga, Chyahkrau buga, Kahtan Yang buga hte Sut Awng Yang laksan ginra na ramma ningbaw ningla ni buga madu ramma ni yawng marai 140 sa du sharin hkamla nga ai rai nna ginsup lamang ni mung lawm ai re.

Kapmaw rap a ramma ningbaw ningla sharin hpawng ndai lang hte rai yang 2 lang ngu na ramma ningbaw ningla sharin hpawng re hpe chye lu ai.