Karai magam gun 25 ning hpring gumhpraw Jubali poi shagrau hpawng galaw

Laiza Jau Ginwang Pajau Bum mare San Joseph Gawknu hta December 29 ya shani Sara Kaba Joseph Ndau Dut a Karai magam gun ai 25 ning hpring gumhpraw Jubali poi shagrau hpawng galaw ai lam chye lu ai.

Hkying 10:00am aten hta gaw Sara Kaba Ndau Dut a 25 ning hpring Jubali Missa hkungga nawng ai lam galaw ai. Dai hpang shagrau sha a lamang matut galaw ai hta, Wa Jau Columban Labang Lar Di ( Ningtau Ginwang Up Jau ) kaw nna hpawng hpaw akyu hpyi ya ai. Du Kaba Lahkring Gum Sau gaw Jubali labau lai ka hti ya ai.

Wa Saradaw Raymond Sumlut Gam ( Manmaw Saradaw Ginwang Up ) kaw nna Jubali shagrau mungga shaga ya ai. Wa Saradaw Raymond Sumlut Gam kaw nna sha, Jubali lakmat hte dazik hpe shagrau ya ai re.

Sara Kaba John Nhka Tang Gun ( Manmaw Saradaw Ginwang Ginjaw Tarahkaw Sara Hpung Komiti Ningbaw ) kaw nna Jubali shagrau laika hti ya ai. Ndai Jubali poi shagrau hpawng hta du sa ai hpung shawa yawng marai 360 jan sa du shanglawm ai lam chye lu ai.