KBC buga ramma hpa-awn ni a hkrumzup sharin hpawng galaw na

KBC Ramma Magam Dap kaw nna woi awn nhtawm, KBC buga ramma hpa-awn ni a hkrumzup sharin hpawng hpe Htingnai Ginwang, Nawng Ing Buga, Na Mawn mare kaw, November shata praw 5 ya shani manam zup nna, praw 9 ya shani manam bya na re lam chye lu ai.

Sharin ga baw ni gaw 2019 ning KBC Ramma Magap Dap a ga baw rai nga ai, ngai nga nga ngai, ngai hpe shangun dat e, mayak manghkang kata na woi awn jasat maka, Indaw Gyi ginra na labau hte Special talk video documentary ni re.

Ndai ga baw ni hpe Rev. Lagai Zau Nan (MIT Yangon), Sara Hting Nan Htoi Awng (Kachin Times & 74 Media), Sara Lahpai Tu Hkawng (KTC, Kutkai), Sara Gawlu Gam Maw hte Sara Dumhpau Hkun Li ni re lam chye lu ai.

Sharin hpawng a yaw shada lam hpe KBC Ramma Magam Dap Hpa-awn rai nga ai Sara Jangmaw Nan Hpung kaw nna ya na zawn tsun ai.

“Shada matut mahkai jinghkri (Network) ndai hpe shangang shakang la ai, anhte a kahkyin gumdin lam hpe jawm hkrang shala ai, shada hkuhkau kanawn mazum ai, hpa-awn daw ni kaw ra nga ai lam ni hpe sharin hkamla ai, dai ni na mungkan, dai ni na munghpawm Myanmar mungdan hta hpa baw ni byin nga ai kara hku na anhte matut na woi awn sa wa ra ai daw ni hpe jawm hka ja jawm bawngban ai lam rai nga ai” nga nna tsun ai.

Ndai sharin hpawng hpe shaning shagu galaw ai rai nna, September hte November shata laman galaw ai re hpe mung chye lu ai.