KBC hte RCM nawku hpung ni hkrumzup bawngban hpawng galaw
Hpyen yen mungshawa ni tinang dum nta de bai nhtang wa na lam hte seng nna KBC hte RCM nawku hpung ni a hkrumzup bawngban hpawng hpe Myitkyina, St. Columbus nawku jawng kaw August shata 20 ya shani galaw ai lam chye lu ai.
Bawngban hpawng hta KBC hte RCM lahkawng maga na hpyen yen mung shawa ni tinang dum nta de bai nhtang wa ai shaloi lam amyu myu hku nna garum madi shadaw sa wa na lam hte magam bungli ni hpe nawku hpung lahkawng maga rau jawm galaw sa wa na lam ni hpe bawngban jahkrup ai re lam, KBC Ningbaw Rev. Dr. Hkalam Samson tsun ai.
“Anhte RC hte KBC hpyen yen gaw hpung masha law ai majaw, ndai hpyen yen ni wa ai shaloi anhte atsawm sha makam masham hku, kaga lam amyu myu hku garum madi shadaw ai hku, shinglum lam shanhte a kam hpa ai lam hpe jaw ga, bungli hpe mung rau rau galaw sa wa ga, asuya lahkawng maga de anhte tsun shaga wa ai shaloi mung mai byin ai nmai byin ai ngu ai maga de mung, yak hkak ai lam ni nga ai re majaw rau jawm galaw sa wa ra na lam ni hpe jawm jahta nna, bungli masing hpe jahkrup ai hku re” nga nna tsun ai.
Hpyen yen mungshawa ni mung hpyen yen ladaw 10 ning maga de du wa sai hte maren, grai yak hkak ai lam, tinang lamu ga sun wang tat sum wa ra ai lam, Mungkan kaw na garum ningtum yawm wa ai lam ni nga wa ai re sha n-ga, kaga jam jau ai lam ni mung grai law wa sai re majaw, tinang buga dum nta de bai wa nhtawm galaw lu galaw sha nna dinghku hpe bai pawnba lu na matu shadut mayu ai lam, Sara Kaba matut tsun ai.
“Hpyen koi yen hkrum nga ai nu wa hpu nau ni hpe tsun shadut mayu ai gaw anhte 9 ning hpring, 10 ning maga de du hkra jawm n-gun dat sa ga ai, raitim mung na wa ai shaloi anhte dinghku shawnglam de mung myit ra ai re majaw mai kaja lam gaw anhte pahkam nga na wa ai ngu gaw gara hku mung nmai byin ai, dai ni du hkra pahkam nga ai ngu gaw tsun na grai yak ai re majaw, anhte Karai Kasang hpe mung kam, shada da kam hkat rai nna wa na lam hta masing jaw jaw hte wa na hkyen ga” nga nna tsun ai.
Hkrumzup bawngban hpawng hta KBC de na tatut woi awn galaw nga ai karum kahtau hte bawngring HDD dap kaw na magam gun ni, Catholic KMSS kaw na magam gun ni hte Lashio kaw na Wa Jau ni sa du shanglawm ai lam chye lu ai.
Majan nnan byin hpang wa ai 2011 ning kaw nna tinang dum nta de wa ai hpyen yen hpung masha ni mung grai law sai raitim, asuya lahkawng maga jahkrup nna tara shang tinang dum nta de wa na lam hpe gaw daining 2020 ning kaw nna galaw hpang wa ai re lam matut chye lu ai.
Photo Credit; KBC Kachin, RVA Kachin
