KBC kaw nna garum ai alu gumhpraw hte Rakhine hpyen yen ni ra nga ai malu masha, arung arai ni hpe shalai ya lu
Jinghpaw Wunpawng Hkalup Hpung Ginjaw (KBC) kaw nna majan a majaw hpyen yen tsin yam hkrum nga ai Rakhine IDPs ni hpe garum dat ai alu gumhpraw hte hpyen yen ni ra ahkyak nga ai, malu masha hte kaga lang arung arai ni hpe Mayyu Garum Ningtum Hpung kaw nna hpyen yen camp de shalai ya lu sai lam chye lu ai.
Rakhine hpyen yen ni hpe garum ningtum jaw ai lam hte seng nna KBC Ningbaw Rev. Dr. Hkalam Samson hpe matut mahkai san yu ai hta, “Anhte amyusha ni hpyen yen nga ai ten hta mung, Mungkan ting na wuhpung wuhpawng ni hkum ding dek sa du garum, n-gun jaw ga tsun ai lam ni hpe anhte hkamla lu ai re. Rakhine de mung hpyen yen hkrum nga ai hpu nau ni hpe sa du garum mayu ai lam ni nga ai raitim, sa du na lam nhku ai COVID-19 aten mung rai, sa du na hpe Asuya ni hku nna pat hkum da ai lam ni law law nga ai majaw, Rakhine kaw nga ai CSO ni hte matut nna shanhte ra ai hpe garum na matu sen (50) shagun jaw ai re” nga nna tsun dan ai.
Wunpawng amyu sha ni zawn hpyen yen tsin yam hkam sha nga ai Rakhine de na hpu nau ni mung kaji mi sha pi myit n-gun lu la u ga matu yaw shada let garum jaw ai re lam chye lu ai.
“Myen Mung kata hta dinghku majan grau law wa ai majaw, mungshawa ni a jam jau ai lam mung grau grau law wa ai hpe mu lu ai re. Dai re majaw lak nak lang ai rawt malan rudi amyusha ni a pandung mung lawan du wa ra na shadu ai, lawan bawngban jahkrup nna mungshawa ni a simsa lam hpe grau pandung tawn nna woi awn shangun mayu ai, laknak lang ai ni yawng lawan myit hkrum nna Myen Hpyen Dap, Asuya hte lawan shaga nna, Myen Mungdan hpe ngwi pyaw simsa hkra galaw na aten rai nga sai re” nga nna KBC Ningbaw Rev. Dr. Hkalam Samson tsun lajin da ai re.
Ya na zawn Rakhine hpyen yen ni hpe garum jaw ai alu gumhpraw gaw KBC hpung masha ni alu jaw bang da ai kaw na shawng ningnan lang garum jaw ai re lam, matut nna mung aten masa hta hkan nna matut mahkai htuk manu ai shaloi, hkum ding dek sa du garum ai lam ni galaw sa wa na re hpe chye lu ai.
Photo Credit; KBC Kachin
