KBC kaw nna hpyen yen ni bai nhtang wa lu na matu mare buga de wa du kawan ai lam galaw

Waimaw hte Kampaiti lam mayan na hpyen yen htinggaw 60 jan gaw du wa na shaning lanam ta garai ndu shi ai laman tinang mare buga de bai nhtang wa na lam hte seng nna, KBC kaw nna woi awn ai hte October shata 27 ya shani hpyen yen ni wa nga na mare buga dum n-ta ni hpe wa du kawan ai re lam na chye lu ai.

Hpyen yen ni wa nga na shara hpe wa du kawan ai lam hte seng nna KBC Ningbaw Rev. Dr. Hkalam Samson ya na zawn tsun dan ai.

“Dabu bum shadaw 6 de na hpyen yen ni htinggaw 60 jan gaw lanam ta ndu shi ai laman gara hku nlu nga sai, wa mayu sai, lu sha ni mung ndu mat sai majaw, ngam nga ai htinggaw 60 jan wa na nga ai hpe seng ang ai lit nga ai ni hte jawm jahkrup nna, shanhte a dum n-ta gara hku gawgap ya lu na shara wa yu ai re” nga nna tsun dan ai.

KBC kaw nna Dabu Bum de nga ai hpyen yen ni hpe shawng nnan du wa na shaning na lanam ndu shi ai laman lu wa hkra galaw sa wa na rai nna, hpyen yen ni mare buga de wa na matu myit hkut sai re majaw, shim lum lam hte seng nna gara hku nlu galaw ya ai raitim, seng ang ai ni hte jahkrup ya ai hte malu masha hte seng nna jahkrup da ai lam ni nga ai re nga nna, Sara Kaba matut tsun dan ai.

“Hpyen yen ni dum nta de bai nhtang wa na lam hte seng nna Myen Asuya hte Shanglawt Asuya lahkawng maga jahkrup nna galaw nga ai bungli re majaw, tinang ang ai maga hku nna jawm galaw ra na bungli gaw rainga, shanhte mung tinang nta wa ai re majaw, asan sha dut dang ai lam nnga ai sha wa na lam hpe jawm galaw ya yang grau lawan na re ngu n-gun jaw mayu ai” nga nna tsun dan ai.

Mare buga de bai nhtang wa na hpyen yen mare ni gaw, Lahpai, Gaw Nan, Lajawng, Lugyi, Mang Shang, Naw Lang hte Lu Myang mare ni re lam, ndai hpyen yen ni gaw laiwa sai 2011 ning majan nnan byin hpang ai kaw nna hpyen yen hkrum ai mare ni rai nna, ya aten mare buga hte bai nhtang wa na lam hte seng nna KBC kaw nna woi awn galaw nga ai re lam chye lu ai.

Photo Credit; KBC Kachin