KBC laili laika hte htangdip magam dap ni woi awn nna, ga gale ladat sharin hpawng galaw

KBC laili laika hte htangdip magam dap ni woi awn nna, ga gale ladat sharin hpawng hpe KBC ginjaw rung kaw October shata praw 2 ya shani kaw nna praw 4 ya shana du hkra 3 ya tup galaw ai lam chye lu ai.

Sharin ya na sharin Sara ni gaw Yangon kaw na Sara Mung Dan Zau, KBC amu madu Usa Rev. Paw Naw Tawng hte laili laika hpuawn Rev. Lagyawm Hkaw Luk ni sharin ya na rai nna, sharin ginhpan ni gaw Ga gale ladat ni, Chyum laika ga gale ai ladat ni hte Chyum ga gale hte seng ai basic ni hpe sharin ya ai re lam chye lu ai.

Yaw shada lam hpe Myitkyina ginwang laili laika hpu-awn Saranum kaba La-u Hkaw Tswi ya na zawn tsun ai. “Ga gale Sara, laika ka sara ni law law pru wa nna, laika ka ngut ai hpe ga gale nna laika buk shapraw ai hpaji chye ai masha ni paw pru wa na matu hte anhte KBC kaw laili laika buk, laika sut ngam da lu na matu re” nga nna tsun ai.

Shingyim masha aprat labau, amyusha labau ngam na matu gaw laili laika grai ahkyak ai. Sumroi, ga shagawp, mau mwi ni hpe labau hku ka ai ni nga ra ai majaw, laika ka sara ni ka da ai hpe bai ga gale ai hpaji hpe law law sharin la shangun mayu ai re. Dai majaw mungshawa kanu kawa ni hte ramma shayi shadang sha ni mung aprat galai sai re majaw, hpaji hte kan bau ai hpaji hte amyu hpe shalawt ai, laili laika hte tinang labau hpe ngam hkra re ai ningmu ni hpaw saga nga nna Saranum matut tsun ai.

Ga gale ladat sharin hpawng hpe laning mi hta kalang galw ai rai nna, daining na sharin hpawng hta Myitkyina ginwang, Waimaw ginwang, Uru Seng Maw ginwang, Lawu ga ginwang, Sama ginwang, Chihpwi ginwang, Waimaw chyumjawng na Sharin sara ni, Myitkyina ginwang Sa sana chyumjawng na sharin sara ni hte shinggan hta English chyushin hpaw sha nga ai ni yawng marai 40 daram sa du sharin hkam la nga ai lam chye lu ai.