KBC Ningbaw Ningla ni hte Myen Hpyen Dap a Dap Awn Daju Min Aung Hlaing Hkrum shaga

KBC ningbaw Rev.Dr. Hkalam Samson, KBC Amu Madu Rev. Hpauyawng Tu Mai, KBC HDD Hpa-Awn Sara Hpauyam Hka Li, Salang Lamai Gum Ja (PCG) hte Salang Hkapra Hkun Awng (PCG) ni gaw  Myen Hpyen dap a Dap Awn Daju Senior General Min Aung Hlaing hte Mandalay Hkawhkam wang kaw September shata 12 ya shani sa du hkrum shaga ai lam na chye lu ai.

Hkrum shaga ai lam hta Myen hpyen Dap a Dap Awn Daju Senior General Min Aung Hlaing hku nna, Rev.Dr. Hkalam Samson a tara jawat hkrum ai hpe dawm kau ga ai lam, Simsa lam hpe lawan jawm galaw ra ai lam, makam masham hpung hpe zingri zingrat n-nga ai lam, IDPs ni bai wa na hpe lawan galaw ra ai lam, Munghpawm grin nga ra ai lam, Shi gaw maga mi de sha shanang ai masha nre lam hte တပ္မေတာ္မူ (၆) ခ်က္ gaw simsa lam kaja wa ra yang, mai jahkrup ai lam hte hpang kalang bai hkrum na myit mada ai lam ni hpe tsun ai lam chye lu ai.

Rev.Dr. HkaLam Samson hku nna bai tsun ai gaw, Tara jawat ai lam dawm ya ai majaw kabu ai lam, Mungdan kata, Maigan mungdan na Kachin ni yawng kabu hkap tau la ai sha n-ga, International wuhpung ni, mungkan nawku hpung ni yawng hkap tau kabu ai lam, Tara jawat ai lam dawm ai gaw hpyen dap a galai shai ai lam hpe mungkan kaw na ta tut mu lu ai lam, Hpyen Dap gaw myit galu kaba hkam sharang let, mungshawa ni a madi shadaw ai hpe lu la ra ai lam, Bilateral lawan htu nna, IDPs ni yawng wa na lam galaw yang simsa lam hpe lawan lu la na re lam, Makam masham hta garan ai lam hte seng nna, ningmu shai na re lam hte Namhkam kaw nga ai Sara Kaba Dr.Ola Hanson a nta hpe bai lu la yang Kachin ni grai kabu na re lam KBC ningbaw Rev.Dr. Hkalam Samson tsun ai.

Rev.Dr. Hkalam Samson gaw lai wa sai July 17 ya shani hta American Gumsan magam Donald J.Trump hte hkrum shaga ai hta Myen hpyen dap kawn Christan makam masham ni hpe dip da ai lam, Myen mung a Democracy Federal masa lam hta American kawn garum ya na hte Myen Hpyen Dap a ningbaw ningla ni hpe Santion galaw ai lam gaw grai tang du ai hte chyeju dum ai lam ni hpe tang madun lai wa sai re.

Ya na zawn tang madun ai majaw, Myen Hpyen Dap kaw nna August shata 26 ya shani hta Rev.Dr. Hkalam Samson hpe ahkyak la ya na matu Myitkyina tara rung de amu shawk shawn da ai raitim, September shata praw 9 ya shani hta Myen Hpyen Dap kaw nna sha, amu shawk shawn da ai hpe bai dawm shaprai kau ai lam chye lu ai.

Photo Credit; KBC Kachin