KBC Num Komiti hpaw hpang ai 100 ning hpring jaw masat chyeju shakawn hpawng hte 7th lang na Manmaw Ginwang num shawa chyum laika sharin hpawng galaw na
KBC Num Komiti hpaw hpang ai 100 ning hpring jaw masat chyeju shakawn hpawng hte 7th lang na Manmaw Ginwang num shawa chyum laika sharin hpawng hpe Manmaw Ginwang Nba Pa buga hkalup hpung hta du wa na March shata 26 ya shani manam zup nhtawm 30 ya shani manam bra na rai nna ndai hpawng lamang hpe Manmaw Ginwang ni madu tai lit la galaw na re lam chye lu ai.
100 ning hpring chyeju shakawn hpawng hte Chyum sharin hpawng hta mara raw wunli la akyu hpyi ai lamang, Chyum laika shakrai shingjawng ai lamang, shagrau sha a lamang hte manau nau ai lamang ni lawm ai rai nna manau nau hpaw hpe gaw March shata 25 ya shani hta galaw hpang na re lam chye lu ai.
“Chyum sharin hpawng kaw dai ning na ga baw rai nga ai “ Hkalup Makam Hte Nawku Hpung Hta Sadi Dung Let Kaba Rawt Wa Ga” ngu ai ga baw hpe KBC Amu Madu Rev. Hpauyawng Tu Mai, KBC Num Hpa Awn Saranum Kaba Lahpai Nang Tawng hte KTCS Nawngnang Chyum Dakkasu kaw na Saranum Kaba Marip Hkawn Tawng ni kaw nna sa du sharin ya na re lam, Ningchyoi Ningja Sari Rawng Ai Num ngu ai ga baw hpe mung, Mandalay Buga Hkalup Hpung a Amu Madu Saranum Kaba Dr. Nhkum kying Nang hte Saranum Kaba Sabaw Lu San yan kaw nna wa du sharin ya na re” nga nna Manmaw Ginwang Num Komiti Ningbaw Saranum Kaba Nbrang Hkawn Din tsun ai.
KBC Num Komiti hpe laiwa sai 1919 ning March shata praw 7 ya shani galaw ai hpung shawa zuphpawng kaw nna 1st lang na num hpung hpawng woi galaw hpang wa ai re. Dai hpang num hpung ngu ai ga si hpe n lang sai sha ya gaw KBC Num Komiti ngu nna bai shamying lang ai re hpe chye lu ai.
