KBC tsi rung kaba byin tai wa na matu KBC hte Care Management Group ni myit hkrum ta masat (MOU) ka

KBC tsi rung kaba byin tai wa na matu rau jawm hkrang shapraw sa wa na lam hte seng nna KBC hte Care Management Group ni myit hkrum ta masat (MOU) ka ai hpe July shata 29 ya shani KBC Ginjaw Rung kaw galaw la lu sai lam chye lu ai.

KBC Tsi Rung kaba hpe COVID-19 ladaw ngut ai hpang gawgap sa wa na re majaw, ya aten laman ra mara jawm hpaji jaw hkyen lajang ai lam galaw sa wa na matu, tsi rung gawgap ai lam hpe lahkawng maga lit jawm la nna jawm gawgap sa wa na hte shawa masha ni hpe tsi tsi shamai ya ai kawn hkawt myit hkrum ta masat ka da sai re lam chye lu ai.

KBC Tsi Rung kaba hpe Myitkyina Manghkring kaw gawgap sa wa na hte tsi rung kaba gawgap ai lam gaw moi na kaji kawa ni a shingran hpe hkrang shapraw sa wa ai lam rai nna, Jinghpaw wunpawng amyusha ni madang nga ai tsi Sara Wun ni hte tinang ginra kaw tsi tsi shamai la lu na matu yaw shada ai lam, KBC Muna Kyithkai Hpu-awn Sara Maran Naw Di Awng tsun ai.

“Wunpawng sha ni Maigan sumtsaw sum tsan ga de gai rai nna tsi tsi lajang hkawm na n manu ai ni ja gumhpraw kaw na hkawt, nang kaw manu grai hkak ai hku nna, ndai standard nga nga re ai tsi Sara Wun ni hte Jinhpaw Mung kaw lu tsi shamai la lu na matu yaw shatawng shada let rai nga” nga nna tsun ai.

Hkamja lam hte Hpaji lam gaw masha langai hta ra ahkyak dik ai rai nna, wunpawng amyusha ni yawng a matu KBC kaw nna hkrang shapraw galaw sa wa ai lam re majaw, ngut hkre wa ai ten du hkra lam shagu hta akyu hpyi myit dum na lam, Sara Maran Naw Di Awng matut tsun ai kaw na chye lu ai.

Photo Credit; KBC Kachin