KIA Dap Ba ( 1, 2, 6 ) ginra ni hta gasat gala majan byin

KIA Dap Ba ( 1 ) Dap Dung ( 7 ) ginra de, shamu shamawt htu lung wa ai Myen hpyen hpung hte KIA hpyen hpung ni, February praw 2 ya shana daw hkying 4:20pm aten hta Nhkru Tu post kaw gasat gala majan byin ai lam, shawnglam shisawk ni shana wa ai kawn chye lu ai.

KIA Dap Ba ( 2 ) Dap Dung ( 14 ) ginra, Chanta Kung, Dawi post de, February praw 2 ya shani Myen hpyen hpung ni htu shadut lung wa ai majaw, KIA hpyen hpung hte gasat majan byin ai rai nna, Chanta Kung, Dawi post kaw January 29 ya shani kaw na gasat poi byin ai re.

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Wing Seng hte Mung Baw Hu Na mare lapran kaw, February praw 1 ya shani hkying 10:30am aten hta Hk.M.Y ( 220 ) dap na hpyen hpung ni hpe KIA hpyen hpung ni bawm hte hkap shingla gasat dat sai re.

KIA ni gasat dat ai hpang Myen hpyen ni gaw sinat kaji majoi gap dumbre bun ai majaw, hkauna galaw nga ai mungmasha salang Mangshang La Ting a du pawt kaw pala hkra hkala nna dai salang wa gaw KIA ni nga ai maga de hprawng lawt pru wa ai, salang Nhkum Zau Hpan hpe gaw Myen hpyen ni lu rim la nna adup zingri woi hkawm nga ai lam, buga masha ni kawn chye lu ai.