KIA Dap Ba (1), Dap Ba (5) hte Dap Ba (9) ginra ni hta gasat gala majan byin
Ginjaw ginra, KIA Dap Ba (5), Dap Dung (30) hpyen hpung ni hte Myen hpyen ni April shata 11 ya jahpawt hkying 8:45am aten kawn hkying 9:00am aten laman, Alaw Bum lawu kaw gasat gala majan byin ai lam chye lu ai.
Myen hpyen ni gaw, n gun 200 daram hte hpyen man lahkawng hku nna, KIA ni nga ai Alaw Bum maga de htu shadut lung wa ai majaw, gasat poi byin ai re lam, shawng lam na lit nga ai Salang langai tsun dan ai.
Shana maga hkying 4:43pm aten hta Myen hpyen ni Jet nbungli lahkawng hte KIA ni shara la nga ai, Bum Chyang Post grup yin kaw bawm wa jahkrat, wa gap kau da ai re.
Dai hpang hkying 7:06pm aten hta mung, Alaw Bum mayan kaw Jet nbungli langai hte bawm wa jahkrat bun ai rai nna, KIA Dap Dung (25), Dap Dung (30) ni nga ai shara de, Myen hpyen ni sinat kaba hte 110 lang gap sharu bun ai lam chye lu ai.
KIA Dap Ba (1), Dap Dung (10) ginra, Mali Yang maga kawn Sumpra Bum maga de lung wa ai Myen hpyen Hk.L.Y (46) hte Hk.L.Y (138) dap na pawng hpawm hpyen hpung ni hpe April shata 11 ya shana daw hkying 1:25pm aten hta KIA ni hkap gap ai kawn gasat gala byin ai.
Bai nna, KIA Dap Ba (9), Dap Dung (44) ginra, Nam Ya mare kawn Hpakant maga lagaw lam hte lung wa ai Hk.M.Y (381) hte Hk.M.Y (382) dap na pawng hpawm hpyen n gun (80) daram hpe dai na maga hkying 3:15pm aten hta KIA ni hkap gap ai kawn gasat poi byin ai lam chye lu ai.
Myen Hpyen Dap gaw, April shata praw 1 ya shani kaw nna, shata mi tup hpyen shamu shamawt lam hte gap hkat jahkring ndau da ai aten, KIA ni nga ai shara de hpyen n gun law law htu shadut lung wa ai majaw gasat poi byin ai sha n ga, Jet nbung li hte du hkra bawm wa jahkrat, wa gap bun ai hpe mung chye lu ai.
