KIA Dap Ba ( 2 ), Dap Ba ( 3 ), Dap Ba ( 5 ) ginra ni hta gasat gala majan matut byin
KIA Dap Ba ( 2 ) ginra hta shamu shamawt nga ai Myen hpyen dap, Hk.L.Y ( 251 ) na hpyen n-gun ( 40 ) daram hte KIA hpyen hpung ni December 18 ya shani hkying 11:20am aten kawn hkying 12:05pm aten laman Ting Kawk mare baw ဦးျမပာန္ a kanoi sun kaw gasat majan byin ai lam, shawnglam shisawk ni kawn chye lu ai.
N-ga Ga mare hte Maisak Post kaw shara jahkrat nga ai Myen hpyen dap ni mung, laknak kaba hpan hkum hte KIA hpyen hpung ni nga ai maga de gap sharu bun ai.
December 18 ya jahpawt hkying 9:27am aten hta mung, KIA Dap Ba ( 3 ) Dap Dung ( 12 ) ginra, Hka Hpawk Hkyet hte Dung Hkung Hkyet lapran kaw gap hkat ai, dai hpang Daga Hkyet maga hku lung wa ai Myen hpyen hpung hte KIA Dap Dung ( 27 ) hpyen hpung ni, hkying 1:00pm aten hta Nlung Kai Lang kaw gap hkat ai.
December 17 ya shana hkying 7:00pm aten hta mung, KIA Dap Ba ( 5 ) Dap Dung ( 3 ) ginra, Zai Awng kaw nga ai Hk.M.Y ( 382 ) dap na hpyen hpung hte KIA Dap Nawng hpyen hpung ni, minute 15 daram ang katut gasat majan byin ai.
Ya aten Myen hpyen dap ni gaw, KIA ni nga ai shara shagu ngu na de, hpyen n-gun law law hte hpyen n-gun jat bang nga ai re. Daini December 19 ya shani hta mung, KIA Dap Ba ( 3 ) Dap Dung ( 1 ) ginra, Madang Yang maga de, mawdaw 11 hta hpyenla hpring hpring htaw nna lai lung wa sai lam, shawnglam shisawk ni shana wa ai kawn chye lu ai.
