KIA Dap Ba ( 2 ) Dap Ba ( 4 ) Dap Ba ( 6 ) ginra ni hta gasat majan byin
KIA Dap Ba ( 2 ) ginra, Ting Kawk hka hte Hka Mut hka mazup kaw du nga ai Myen hpyen hpung hpe, February praw 4 ya shani hkying 10:40am aten hta KIA hpyen hpung ni sa htim gap ai kawn gasat majan byin ai lam, shawnglam shisawk ni shana wa ai.
Shana maga hkying 3:06pm aten hta gaw Myen hpyen dap ni Helicopter nbungli 2 hte KIA Dap Dung ( 11 ) ginra, Pa Hpa mahkrai mayan hku bawm 20 lang wa jahkrat bun nhtawm, KIA ni nga ai Seng Da Post hpe mung, jak sinat hte wa htim gap ai lam chye lu ai.
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 8 ) ginra hta mung, Myen hpyen hpung hte Balawng ( Ta-ang ) TNLA hpyen hpung ni, February praw 4 ya shani hkying 11:13am aten hta Mung Yin mare makau kaw gasat majan byin ai.
KIA Dap Ba ( 6 ) Dap Dung ( 2 ) ginra hta mung, February praw 4 ya shana daw hkying 4:30pm aten hta Kugang MNDAA hpyen hpung hte Myen hpyen dap, Hk.M.Y ( 363 ) dap ni, Loi Tawng mare hte Hu Hin mare lapran kaw gasat poi byin ai lam chye lu ai.
