KIA Dap Ba ( 2 ) ginra de Myen hpyen dap ni bai shamu shamawt wa
Sinna Ginwang Ginjaw, KIA Dap Ba ( 2 ) Dap Dung ( 14 ) ginra de Myen hpyen dap ni bai shamu shamawt wa nga ai, November praw 1 ya shani Danai kawn modo lahkawng hta hpyenla hpring hpring htaw nna, Dung ( 14 ) maga de rai wa sai lam, myi chyaw mu ai buga na salang langai tsun ai.
Dung ( 14 ) ginra de laiwa sai June shata na zawn gasat gala majan kaba bai byin wa na hpe buga masha ni hkrit tsang nga ai lam, salang wa matut tsun ai.
November praw 2 ya shani Dung ( 14 ) ginra Lawt Ja maga kawn pru wa ai mungshawa ni a Back-hoe ( 13 ) hpe Hk.L.Y ( 297 ) dap hte Pyi Tu Tsit ( P.T.Ts ) pawnghpawm hpung ni kawn, Awng Ra mare Hpunggyi jawng kaw rim zing da ya ai lam, buga masha ni kawn chye lu ai.
