KIA Dap Ba ( 2 ) ginra hte Dap Ba ( 4 ) ginra ni hta gasat gala byin

KIA Dap Ba ( 2 ) Dap Dung ( 14 ) ginra, One Pala Post kaw du nga ai Myen hpyen n-gun 100 jan daram gaw, March 20 ya shana daw hkying 3:00pm aten daram hta KIA hpyen hpung ni shara jahkrat nga ai N-gam Hkyeng Post hpe wa gap ai kawn gasat gala majan byin ai lam, shawnglam shisawk ni shana wa ai.

Ya aten hta Myen hpyen hpung ni gaw, Jahtu Zup hte Hka Da Zup sa lam maga de, hpyen n-gun 100 jan ram naw shamu shamawt nga ding yang re lam, salang langai shana wa ai kawn chye lu ai.

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 34 ) ginra hta gaw, Balawng ( Ta-ang ) TNLA hpyen hpung hte Sam RCSS/SSA hpyen hpung ni mung, March 20 ya jahpawt hkying 7:00am aten hta Pan Gut mare makau kaw gasat gala majan byin ai lam nga ai.

Dai gasat majan hta RCSS/SSA maga de, machyi hkrum ai loi nga ai majaw, hkying 1:40pm aten daram hta Myen hpyen dap ni Jet Fighter nbung li hte wa gap garum ai lam na chye lu ai.