KIA Dap Ba ( 2 ) hte Dap Ba ( 3 ) ginra hta gasat gala majan byin nga
KIA Dap Ba ( 2 ) Dap Dung ( 14 ) ginra, Mai Htang hte Nam Jawn hka maga kawn shang wa ai Myen hpyen hpung hte KIA Dap Dung ( 14 ) na hpyen hpung ni, December 13 ya shani hkying 10:30am aten hta Chyasam Hka makau kaw gasat majan byin ai lam, shawnglam shisawk ni kawn chye lu ai.
Gasat majan byin ai hpang hkying 2:05pm aten kaw na hkying 5:15pm aten du hkra, Mai Sak Post hte N-Ga Ga mare kaw nga ai, Hk.L.Y ( 86 ) dap ni gaw, majan byin ai shara hte laga shara ni de sinat kaba ( 50 ) jan lang gap sharu bun ai.
Ya na zawn Myen hpyen dap ni sinat kaba hte hkrup mara gap bun ai majaw, Tsan Lun Maw kaw sinat kaba pala ( 2 ) wa hkrat kapaw ai majaw, mungmasha salang Mashi Bawm Hkaw a hkra lagaw shinglang kaw pala hkyep wa hkra hkala mat ai lam chye lu ai.
Matut nna, Bawsa Di mare hte Na Maw Pa mayan hku shamu shamawt nga ai Myen hpyen dap, Hk.L.Y ( 254, 258, 259 ) na pawng hpawm hpyen hpung hte KIA Dap Dung ( 6 ) hpyen hpung ni mung, hkying 4:45pm aten kawn hkying hkying 5:45pm aten du hkra, Anang Hku, Ura hka mazup lahta kaw gap hkat ai.
KIA Dap Ba ( 3 ) Dap Dung ( 27 ) ginra, Loi Hkyep hte Sau Ram maga na lung wa ai, Hk.L.Y ( 78 ) dap na Myen hpyen hpung hte KIA Dung ( 27 ) hpyen hpung ni, December 13 ya shana maga hkying 5:20pm aten hta Chyam Ka mare makau kaw gap hkat ai lam chye lu ai.
