KIA Dap Ba ( 2 ) hte Dap Ba ( 3 ) ginra hta majan byin
KIA Dap Ba ( 2 ) Dap Dung ( 14 ) ginra hta shamu shamawt hkawm nga ai Myen hpyen hpung hte KIA hpyen hpung ni, December 24 ya jahpawt hkying 8:40am aten kaw na Htang Bra hte Woi Law mare dingsa lapran kaw laja lana gap hkat nga ai lam, shawnglam na salang langai shana wa ai.
Myen hpyen ni gaw, Lapu Hka Ja Maw maga lai lung wa mayu nna, grai shaja nga ma ai. Daihte maren anhte maga na ni mung grai shaja nga ga ai, nga nna salang wa tsun ai.
KIA Dap Ba ( 3 ) Dap Dung ( 27 ) hpyen hpung ni shara jahkrat nga ai maga de, Bum Chyaw Bum maga na Myen hpyen hpung ni shadut lung wa ai majaw, December 23 ya jahpawt hkying 7:15am kawn hkying 9:18am aten du hkra, Kale Hkyet hte Sa Ra Kadit kaw gasat gala majan byin ai.
Kai Htik, Man Dat, Bum Chyaw Bum kaw shara jahkrat nga ai Myen hpyen dap ni mung, KIA ni nga ai shara de, laknak kaba hte gap bun nga ai sha n-ga majan byin ai maga de mung, laknak kaba gap bun nga ding yang re lam chye lu ai.
