KIA Dap Ba ( 3 ) hte Dap Ba ( 10 ) ginra hta gasat gala byin
KIA Dap Ba ( 3 ) Dap Dung ( 1 ) ginra hta shamu shamawt nga ai Myen hpyen hpung hte KIA hpyen hpung ni, April praw 4 ya jahpawt hkying 7:30am aten hta Lajawng mare kaw gasat gala majan byin ai lam, shawnglam na salang langai shana wa ai.
Lung Ja kawng hte Manje mare shingnawm kaw nga Myen hpyen dap ni gaw, gasat majan byin ai maga de laknak kaba hte gap bun ai, majan gaw matut nna naw byin wa mai ai shanhte mung htingnut mat ai lam nnga ai lahkawng maga naw sin hkat nga ai, lam salang wa tsun ai.
Myen hpyen dap ni gaw, laiwa sai March shata 31 ya shani kaw nna KIA Dap Dung ( 1 ) ginra de, hpyenla hpring hpring htaw ai hpyen modo 12 hte hpyen n-gun wa sa tawn ai lam chye lu ai.
Mungmyit Sinli Ga ( Kachin Su-State ) KIA Dap Ba ( 10 ) Dap Dung ( 17 ) ginra hta mung, April praw 3 ya shana daw hkying 3:30pm aten hta Kugang hpyen hpung MNDAA hte Myen hpyen hpung ni, Man Lun mare hte Bang Gu mare lapran kaw gasat gala majan byin ai.
KIA Dap Ba ( 2 ) Dap Dung ( 20 ) ginra hta gaw, Hk.L.Y ( 298 ) dap ni kawn April praw 2 ya shana hkying 8:00pm aten hta mare kata de sinat kaba gap bun ai majaw, Dum Bung mare na salang Lahpai San Awng hte Jan. Ura Roi Awng ni a nta makau kaw wa hkrat kapaw ai re.
Dai wa hkrat kapaw ai hta nta masha ni gan hkawm mat ai aten re majaw hkala nba gaw nnga ai raitim, pala hkyep hte nta shakum, numgaw na hpri tsut ni waw mat ai lam chye lu ai.
