KIA Dap Ba ( 4 ), Dap Ba ( 6 ) ginra hta gasat gala majan byin
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 8 ) ginra, Kut Hkai Man Lung ntsa Hpun Kya Kawng kaw, January praw 5 ya shani hking 11:55am aten hta KIA hpyen hpung hte Myen hpyen ni gasat gala majan byin ai.
Ndai shara hta January praw 4 ya shani hta mung, KIA hpyen hpung hte Myen hpyen hpung ni gap hkat ai re lam, shawnglam shisawk ni kawn chye lu ai.
KIA Dap Ba ( 6 ) Dap Dung ( 2 ) ginra hta shamu shamawt nga ai Myen hpyen hpung hte MNDAA Kugang hpyen hpung ni mung, January praw 5 ya shani hkying 11:30am aten hta Bang Sak hte Jau Myen mare lapran kaw gasat poi byin ai.
January praw 5 ya shani hta sha, Man Maw kaw na lung wa ai Myen hpyen dap a Jet nbungli 2 hte KIA Dap Ba ( 3 ) Dap Dung ( 27 ) ginra, Maji Gung kaba mayan kaw, shana maga hkying 2:12pm kawn hkying 2:16pm aten laman, bawm wa jahkrat bun nna Man Maw maga bai nhtang yu mat ai lam chye lu ai.
Ya aten KIA Dap Ba ( 2 ) ginra hta dap jung shara jahkrat nga ai Myen hpyen hpung ni mung, Danai lam Hkawng Law Tingkawk mare na Myen hpyen dap, shagyit ( Gate ) shara ni hta laisa laiwa mungshawa ni a Modo, Cycle ni hpe laja lana san jep nga ai hta n-ga nkau mungmasha ni hpe gaw nhtang wa kau shangun ai lam, buga masha ni kawn chye lu ai.
