KIA Dap Ba (6), Dap Ba (4), Dap Ba (2) ginra ni hta KIA hte Gumshem Myen hpyen dap ni gasat gala majan matut byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra hta, Lashu kawn hpyen shamu shamawt lung wa ai Gumshem Myen hpyen Modo (29) hpung ni hpe Hu Nawng hte Nam Gut lapran kaw October shata (31) ya jahpawt hkying 2:25am aten hta, KIA hpyen hpung ni hkap gap ai kawn gasat gala majan byin ai lam chye lu ai.
Dai Gumshem Myen hpyen hpung ni hpe sha shana maga hkying 4:30pm aten hta, Man Lwi hte Nam Hpalun lapran kaw KIA hpyen hpung ni hkap gap gasat ai kawn gasat gala majan byin ai lam, shawng lam na lit nga ai salang langai tsun ai.
Jahpawt hkying 2:00am aten hta gaw, KIA Masat (4) Dap Ba, Masat (39) Dap Nawng Dap Dung ginra, Shu Hkin Ta, Pyi Htawng Su lam ntsa kaw Munggu Hpawng Seng ginra de hpyen shamu shamawt lung wa ai Gumshem Myen hpyen hpung ni hte KIA Dap Dung (39) hpyen hpung ni gasat gala majan byin ai lam chye lu ai.
KIA Masat (2) Dap Ba, Masat (43) Dap Dung ginra hta mung, Jahtu Zup maga kawn hpyen arung arai hte malu masha htaw lung wa ai Gumshem Myen hpyen Modo hpe jahpawt hkying 8:15am aten hta, Jambo Bum kaw KIA hpyen hpung ni bawm hte hkap gap gasat dat ai lam chye lu ai.
Mungmyit Sinli Ga ginra hta sha, jahpawt hkying 10:00am aten daram hta, Hpai Kawng mare ntsa kaw Gumshem Myen hpyen dap ni hte Kokang MNDAA ni numdaw mi gasat poi byin ai rai nna, hkying 10:55am aten hta mung, Nam Su hte Naw Gu lapran kaw numdaw mi gasat poi byin ai lam na chye lu ai.
