KIA Dap Ba ( 6 ) ginra hta gasat gala majan byin
October, 4 ya shani KIA Dap Ba ( 6 ), Dap Dung ( 2 ) ginra Kutkai lahta, Man Je Sinpraw maga Kung Sa Bum hta Myen hpyen dap Dapnu ( 99 ) kata na hpyen hpung ni, jahpawt hkying 8:30am aten hte hkying 11:30am aten hta laknak kaba ni hte gap sharu bun nhtawm htu shadut lung wa ai majaw KIA Dap Dung ( 2 ), ( 37 ), ( 38 ) na
hpyen hpung ni hte gasat gala majan byin ai lam chye lu ai. Dai hpang Shana daw hkying 3:25pm aten hta gaw, Myen hpyen Helicopter ( 2 ) dai gasat gala majan byin ai shara de sa htim gap garum ai lam chye lu ai.
Bai, Kutkai Byuhar kawn Kutkai – Mung Ji lam hpe mung pat hkum kau ai majaw dai ginra hta majan grau laja wa na hpe buga masha ni hkrit tsang nga ai lam na chye lu ai.
KIA Dap Dung ( 2 ) ginra hta lai wa sai October praw 1 ya shani hta mung Myen hpyen dap Dapnu ( 55 ) kata na hpyen hpung ni Mung Ji de gat sa ai Kawng Lim mare na mung shawa marai ( 10 ) hpe rim woi mat nhtawm Kawng Lim hpungkyi jawng kaw san jep ai lam galaw ai hpe na chye lu ai.
