KIA Dap Ba ( 6 ) ginra ni hta Myen Jet nbungli ni hte wa gap bun
KIA Dap Ba ( 6 ) Dap Dung ( 38 ) ginra, Loi Jung Bum hte Lau Shang Chai kaw December, 1 ya jahpawt manap kaw na KIA dap hpawm hpyen hpung ni hte Myen hpyen hpung ni laja lana gasat gala majan byin
nna Dap Dung ( 36 ) ginra hta mung Myen hpyen Jet nbungli ni shani tup wa gap bun ai hte mare kata kaw nbungli bawm ni jahkrat bun nhtawm sinat kaba si n kau mi miwa mung de lai hkrat nna masha hkala ai lam mung chye lu ai.
Mung Gu mare kaang kaw Myen hpyen hpung ni hte KIA dap hpawm hpyen hpung ni December, 1 ya japawt hkying 9:00am aten daram kaw shawoi na hta grau laja lana gap gasat hkat ai lam chye lu ai.
KIA Dap dung ( 6 ) ginra December, 1 ya jahapwt hkying 6:00am aten kaw KIA hpyen hpung ni Hpakan lam, Kum Tsai Zup mare kaw yu wa lung wa mawdaw ni hpe lekmat jep ai lam galaw ai hpe chye lu ai.
Dai hpang, shana daw hkying 2:00pm aten kawn hkying 3:00pm aten du hkra Kum Tsai Zup mare hte Gawlu Yang mare kaw gasat gala majan byin nna dai majan byin ai shara de Nam Ya hpyen dap kawng kaw na 60MM Motor ( 13 ) lang gap bun ai lam mung chye lu ai.
KIA Dap Ba ( 3 ) hte ( 252 ) Dap Nawng Dap Dung ginra, Laihpawng hte Lawhkum post kaw December, 1 ya shani Myen Jet nbungli ( 2 ) hte sa htim gap ai lam mung chye lu ai.
November, 30 ya jahpawt manap hkying 4:00am aten Hku Mung mare Kut Kai တုိးဂိတ္ na Myen hpyen hpung ni hte TNLA hpyen hpung ni gasat gala majan byin ai hpang, Kutkai maga de na lung wa ai Myen hpyen Hprigang Modo ( 2 ), Hpyen Modo ( 8 ) hte Sun Lung mahkrai kaw shani hkying 12:00pm aten hta Myen hpyen hpung ni hte KIA hpyen hpung ni gasat gala majan byin ai lam mung chye lu ai.
Dap Dung ( 2 ) ginra, Mung Hawm Bang Hpik makau kaw KIA Dap Ba ( 6 ) Zai ladat hpyen hpung ni hte Myen hpyen dap Tatma ( 55 ) kata na hpyen hpung ni November, 30 ya jahpwt hkying 9:30am kawn hkying 11:30am aten du hkra laja lana gasat gala majan byin ai lam chye lu ai.
Mung Gu Sahkan Tit Kone hte Man Jak kawng de November, 30 ya shani hkying 1:00pm aten kaw Myen hpyen Helicopter ( 4 ) hte wa gap bun nhtawm bom mung wa jahkrat bun nna Bang Dap kaw laja lana gasat gala majan byin ai lam chye lu ai.
