KIA Dap Ba (6) hte Dap Ba (10) ginra kaw gumshem Myen hpyen hte KIA ni gasat gala majan byin
Myungmyit Sinli Ga (Kachin Sub-state), KIA Masat (6) Dap Ba hte Masat (10) Dap Ba ginra ni hta shamu shamawt chyinglau hkawm ai, gumshem Myen hpyen dap hte KIA hpyen hpung ni gasat gala majan byin ai lam chye lu ai.
KIA Masat (6) Dap Ba, Masat (9) Dap Dung ginra, Hku Mung hte Hanggai lapran kaw September shata praw 5, dai ni hkying 12:40pm aten hta Munggu maga na yu wa ai, gumshem Myen hpyen modo 14 hpung ni hpe KIA ni hkap gap gasat ai lam chye lu ai.
KIA Masat (10) Dap Ba, Masat (2) Dap Dung ginra, Punghtun Manpying mare makau kaw September shata praw 4 ya shani ka-ang 12:00non aten daram hta KIA hpyen hpung ni hte gumshem Myen hpyen hpung ni gasat gala majan byin ai lam chye lu ai.
“Myen hpyen ni gaw Ts.K.Hk (16) kata na hpyen hpung ni re. Anhte kaw na ni ginra gawan hkawm ai kaw, Sinli maga de na hpyen n gun (30) daram lam hkawm lung wa ai hpe Sinli hte Punghtun Manpying mare makau modo lam kaw minute (20) daram gasat poi byin ma ai” nga nna shawng lam na lit nga ai salang langai tsun dan ai.
Gasat poi hta KIA maga gaw hpa nra ai, Myen hpyen maga na marai 5 si, marai 14 hkala hkrum ai hte shanhte a machyi masha ni hpe modo (2) hte wa htaw la mat wa ai lam, buga masha ni kaw na chye lu ai.
September shata praw 3 ya shani hta mung, gasat gala majan byin ai lam nnga ai raitim, Kutkai kaw dap jung ai gumshem Myen hpyen dap ni sinat kaba (2) lang hkrup mara gap shadam dat ai sha n-ga, Kutkai daw (6) Loi Un Balawng mare kaw nga ai Myen hpyen ni mung, sinat kaba (2) lang bai gap shadam dat ai lam, Kutkai ginra masha ni kaw na chye lu ai.
