KIA Dap Ba (6) hte Dap Ba (10) ginra ni hta gasat gala majan bai byin
Mungmyit Sinli Ga (Kachin Sub-state) KIA Dap Ba (6), Dap Dung (9) ginra, Nam Mye Pa kadawng kaw September shata praw 2 ya shana daw hkying 6:30pm aten hta KIA hte Myen Hpyen Dap, Dapnu 88 kata na hpyen hpung ni gasat gala majan bai byin ai lam na chye lu ai.
Myen Hpyen Dap, Tatma 88 kata na n-gun 40 daram gaw, KIA ni shara la nga ai de, shamu shamawt htu lung wa ai majaw, Nam Mye Pa kadawng kaw minute 15 daram gap hkat ai re lam, shawng lam na lit nga ai salang langai tsun dan ai.
Gasat gala majan byin ai shara grup yin hta Myen hpyen hpung ni n-gun 80 jan naw shamu shamawt nga ai majaw, gasat gala gaw naw mai byin wa ai lam, salang wa matut tsun ai.
September shata praw 2 ya shani hta sha, KIA Dap Ba (10), Dap Dung (17) ginra, Lau Yin Jai (Miwa mare) kaw Myen Hpyen Dap, Ts.K.Kh (10) hte Dapnu (99) kata na hpyen hpung ni hte MNDAA, (Kokang), AA Rakhine pawng hpawm hpyen hpung ni gasat gala majan matut byin ai lam chye lu ai.
Majan byin nga ai aten hta Myen hpyen dap ni gaw, Helicopter 1 hte wa gap sharu bun ai sha n-ga, Mung Jet maga de na mung laknak kaba 120mm hte hkrup mara gap shadam bun nga ai lam, ginra shi sawk ni kawn chye lu ai.
