KIA Dap Ba 6 uphkang ginra kata na hpyen hpung ni hte Myen hpyen dap ni gasat gala majan byin
Mungmyit Sinli Ga (Kachin-Sub-State) KIA Dap Ba (6), Dap Dung (36) ginra Pang Hka mare makau kaw, Myen hpyen dap Dapnu (99), HK.M.Y (417) kata na pawng hpawm hpyen hpung ni hte Dap Dung 36 kata na hpyen hpung ni November shata 17 ya shani hkying 1:30pm aten kaw nna hkying 2:10pm aten du hkra shingla gasat gala majan byin ai lam chye lu ai.
Myen hpyen dap Dapnu (99) kata na hpyen hpung ni hte HK.M.Y (417) pawng hpawm hpyen hpung ni gaw KIA Dap Dung 36 kata na MHH hpung (6) ni hkap taw ai shara de htu shadut lung wa ai majaw hkap shingla gasat gala majan byin ai re lam, shawng lam na salang langai tsun dan ai.
Dap Dung (36) ginra hta Myen hpyen dap Dapnu (88) kata na hpyen hpung ni hpyen n gun (100) jan daram hte Dapnu (99) kata na hpyen hpung ni hpyen n gun (80) jan daram hpyen shamu shamawt nga ai rai nna November shata (17) ya shani byin ai majan gaw Dapnu (99) kata na hpyen hpung ni hte byin ai re.
“Nkau mi gaw ya hte tup anhte ni kaw hpyen wa htu taw ai raitim majan nbyin ai sha Nam Tau maga de nhtang wa mat ma ai. Mana gaw Nam Tau kaw wa yup ma ai. Dai hpawt gaw (105) lam de bai pru mat wa ma ai re. Bai nna MHH hpung (6) ni hte gap hkat ai Dapnu (99) hpyen hpung ni gaw nhtang wa mat sai kun, gara hkan naw makoi hkawm ai kun, dai gaw atsawm nchye lu shi nga ai” nga nna shawng lam na salang langai tsun ai.
November shata (17) ya shani hkying 1:00am aten hta mung KIA Dap Dung (9) ginra kaw Myen hpyen dap Dapnu (88) kata na hpyen hpung ni, Hk.L.Y (77) kata na pawng hpawm hpyen hpung ni hte KIA Dap Dung (9) kata na hpyen hpung ni gasat gala majan byin sai re.
Dai hpang shana daw hta Dap Dung (36) ginra na MHH hpung (6) ni hte Myen hpyen dap Dapnu (99), HK.M.Y 417 kata na pawng hpawm hpyen hpung ni matut manoi gasat gala majan byin ai lam re.
Gasat gala majan byin ai hta kaga sinat laknak kaba hte gap bun ai lam nnga ai rai nna, lahkawng maga shada maja nga ai masa re hpe mung matut chye lu ai.
