KIA Dap Dung ( 11, 14, 27 ) ginra ni hta gasat gala byin

KIA Dap Ba ( 2 ) Dap Dung ( 11 ) ginra hta shamu shamawt nga ai Myen hpyen dap, Hk.L.Y ( 252, 256 ) dap na pawnghpawng hpyen hpung hte KIA hpyen hpung ni, December 28 ya jahpawt hkying 6:00am aten kawn hkying 6:30am aten du hkra, Ting Rat hka kau kaw gasat gala byin ai lam, shawnglam shisawk ni kawn chye lu ai.

Dap Dung ( 14 ) ginra, Lapu Hka Ja Maw hte Woi Law mare Sut Masa Magam Dap ( SMD ) shagyit ( Gate ) shingdu kaw mung, KIA hpyen hpung hte Myen hpyen hpung ni gasat gala majan byin ai.

KIA Dap Ba ( 3 ) Dap Dung ( 27 ) hpyen hpung hte Myen hpyen hpung ni, December 28 ya shana maga hkying 2:45pm aten kawn hkying 5:00pm aten du hkra, Loi Jawm Bum, Man Dat sa wa ai lamshe hkyet kaw gasat gala byin ai.

Dap Dung ( 27 ) ginra hta sha, Lu Leng Yang mare baw gat seng dingsa kaw wan kra rawng nga ai Myen hpyen hpung hpe KIA hpyen hpung ni PRG, M-79 sa gap bun ai kawn gasat majan byin ai.

Gasat majan byin ai maga de, Kaihtik kaw dung ai Myen hpyen Myawk dap ni laknak kaba hte gap bun ai lam chye lu ai.