KIA Dap Dung ( 11 ) ginra hta laja lana gasat majan byin ai majaw mungshawa ni hprawng yen nga
KIA Dap Ba ( 2 ) Dap Dung ( 11 ) hpyen dap hte Kasung mare lapran, Kasung Hka makau kaw, August 10 ya jahpawt 9:30am aten hta Ts.K.Hk ( 3 ) kata na Hk.L.Y ( 37 ) dap na hpyen n-gun ( 150 ) daram hte KIA Dap Dung ( 11 ) hpyen hpung ni laja lana gasat majan byin ai lam, hpyen shisawk ni kawn chye lu ai.
August 11 ya jahpawt Myen hpyen ni sinat kaba hte shawng gap bun nna hkying 11:30am daram hta Kasung mare lawk ( 1 ) maga de, Myen hpyen ni du shang wa nna, mungshawa ni hpe hkrup mara rim gap ai kaw, nkau mi si hkala hkrum nna, marai 10 daram hpe gaw rim da ai lam, buga na salang langai kawn chye lu ai.
Ya aten hpyen yen mungshawa nkau mi gaw, Namti Lambraw Yawng RC nawku jawng hte KBC nawku jawng lahkawng hta marai 800 daram du nga sai lam, nkau mi gaw nam de dumbru dumbra hprawng yen nga ai lam, shanhte a shimlam hpe myit tsang nga ai lam, dai salang wa matut tsun dan ai kawn chye lu ai.
