KIA Dap Dung ( 11 ) hte Dap Dung ( 14 ) ginra hta gasat gala byin
KIA Dap Ba ( 2 ) Dap Dung ( 11 ) hte Dap Dung ( 14 ) ginra de, Myen hpyen dap ni, hpyen n-gun laknak n-gun law law hte shamu shamawt lung wa ai majaw, KIA hpyen hpung ni hte gasat gala majan matut byin nga ai lam chye lu ai.
April 13 ya jahpawt hkying 5:00am aten hta Dap Dung ( 14 ) ginra, Ting Kawk mare hte Nam Hpyek mare lapran na Yuzana Company rung kaw shamu shamawt du nga ai Hk.L.Y ( 297 ), Hk.M.Y ( 381 ) dap hte Pyi Tu Tsit ( P.T. Ts ) pawng hpawm hpyen hpung ni hpe KIA hpyen hpung ni sa htim gap ai lam, shawnglam shisawk ni shana wa ai.
KIA Dap Dung ( 11 ) ginra hta mung, April 13 ya jahpawt hkying 5:22am aten hta Dum Bung mare makau Ting Rat hka kau kaw shara jahkrat nga ai Hk.L.Y ( 298 ) dap hpe KIA hpyen hpung ni sa htim gap ai lam chye lu ai.
Gasat gala majan byin nga ai aten hta Myen hpyen dap ni gaw Dum Bung mare kata de 60mm sinat kaba mare kata de gap bang dat ai majaw, salang Nru Yaw San ( ေက်ာ္ျမင့္ဦး ) a nta kaw wa hkrat kapaw nna salang wa gaw dai kaw njang si sum mat ai, madu jan Hpaujung Htu Sam gaw hkala sawng ai majaw Myitkyina tsi rung de tsi tsi hkamla nga ai lam na chye lu ai.
