KIA Dap Dung (12) ginra hta gasat gala majan matut byin

KIA Masat (3) Dap Ba, Masat (12) Dap Dung ginra hta shamu shamawt chyinglau hkawm ai, gumshem Myen hpyen n gun 80 daram hte KIA ni, January shata 17 ya shani hkying 12:20pm aten hta Namlim Pa hte Man Gai Mare lapran kaw ang katut gasat gala majan byin ai lam chye lu ai.

Gumshem Myen hpyen dap, Hk.L.Y (74) hte Hk.M.Y (348) dap na pawng hpawm tai n gun (80) daram, Namlim Pa kawn lagaw lam hte lung wa ai kaw ang katut gasat poi byin ai re lam, shawng lam na lit nga ai salang ni kaw na chye lu ai.

KIA Masat (1) Dap Dung ginra hta nga ai, gumshem Myen hpyen sinat kaba dap masat (364) dap ni mung, January shata 17 ya jahpawt hkying 10:30am aten hta Nga Pyaw Taw Mare maga de, sinat kaba 81mm (4) lang gap shadam bun ai lam chye lu ai.

Gumshem Myen hpyen dap ni gaw, KIA Masat (12) Dap Dung ginra de, shamu shamawt chying lau shang wa ai majaw, January shata 14 ya shani kaw nna, KIA hte gasat gala majan matut manoi byin nga ai re.