KIA Dap Dung ( 14 ) ginra hta Myen hpyen dap ni Jet nbungli hte wa gap
KIA Dap Ba ( 2 ) Dap Dung ( 14 ) ginra, Lapu Hka Ja Maw, Woi Law mare hte Sut Masa Magam Dap ( SMD ) shagyit ( Gate ) mayan hku, December 27 ya shana maga hkying 3:55pm aten Myen hpyen dap ni Jet Fighter langai hte wa htim gap ai lam chye lu ai.
Dai Jet nbungli gaw Myitkyina maga kawn lung wa nhtawm, numdaw 2 lang bawm jahkrat bun ai, dai hpang Jak sinat hte mung, gap bun kau da nna, hkying 4:25pm aten Myitkyina maga bai yu mat wa ai lam, shawnglam na salang langai shana wa ai.
Munghkawm mare htum pa, hpaji jawng shingdu mayan hkan shara la nga ai Myen hpyen hpung ni mung, KIA ni nga ai hpyen man maga de laknak kaba hte 100 lang daram matut manoi gap bun ai.
Laknak kaba zim ai hte Myen hpyen lagaw dap ni, KIA ni nga ai maga bai htu lung wa ai majaw, Lapu Hka Ja Maw, Woi Law mare hte SMD gate mayan kaw, hkying 5:50pm aten kawn hkying 7:10pm aten du hkra laja lana gap hkat ai.
KIA Dap Ba ( 3 ) Dap Dung ( 27 ) hpyen hpung ni shara jahkat nga ai, Loi Jawm Udang Bum maga de mung, Myen hpyen hpng ni htu lung wa ai majaw, December 27 ya shani hkying 11:38am aten hta KIA hpyen hpung ni hkap shingla gasat ai lam chye lu ai.
