KIA Dap Ba ( 2 ), Dap Dung ( 14 ) hpyen hpung ni shara jahkrat nga ai shawnglam post de, Myen hpyen hpung ni shamu shamawt sa wa ai majaw, June 14 ya jahpawt hkying 5:30am aten kawn hkying 6:00 aten laman, Nam Byu sa lam hte Chyasam Hka lapran kaw gap hkat ai lam, shawnglam shigawk ni kawn chye lu ai.
Daini June 15 ya shani hkying 1:55pm aten hta mung, Myen hpyen hpung ni, KIA hpyen hpung ni nga ai shara de, laknak kaba hte matut gap bun nga ai lam chye lu ai.
June praw 3 ya shani kawn KIA Dap Dung ( 14 ) ginra de, Myen hpyen dap ni, hpyen n-gun kaba hte wa htim gap ai majaw gasat gala majan byin wa ai re.
Majan a majaw Dung ( 14 ) ginra na, mungshawa ni Danai Muklum nawku hpung shagu hkan, hpyen koi yen nga ai re. Malu masha ni hpe gaw nawku hpung ni lit la nga ai raitim, aten galu wa yang, malu masha hte jawnglung ai jawngma ni a matu, grai yakhkak wa mai ai lam, dai ginra na salang langai tsun dan ai kawn chye lu ai.
