KIA Dap Dung (15) ginra, Lung Ja Bum mayan hta gasat gala majan matut byin
KIA Masat (3) Dap Ba, Masat (15) Dap Dung ginra, Lung Ja Bum mayan hta October shata 29 ya jahpawt hkying 8:30am aten kaw nna, gumshem Myen hpyen hte KIA ni gasat gala majan matut byin ai lam, ginra shiga lawk kaw na chye lu ai.
Gumshem Myen hpyen dap ni gaw, hpyen n gun tsa kahtap hte KIA ni shara la nga ai Lung Ja Bum mayan de, lagaw lam hku nna mung, Jet nbungli hte mung htim gasat shang wa ai majaw, shani shagu ngu na gasat poi byin nga ai re.
Nmawk kaw dap jung ai gumshem Myen hpyen Hk.M.Y (437) dap kaw nna, Lung Ja Bum maga de laknak kaba gap bun ai lam nga ai. Wa Wang kaw nga ai gumshem Myen hpyen ni gap dat ai laknak kaba, Nmawk Hkanan lawk kaw langai wa hkrat kapaw ai majaw, mungshawa nta hten mat ai sha n ga, mungmasha marai lahkawng mung hkala hkrum ai lam na chye lu ai.
Gasat gala majan byin ai makau gyup yin hkan na mare kahtawng ni mung, shimlum ai shara de hprawng koi yen nga ai raitim, nta sin masha nkau naw nga ai kaw ya na zawn myawk si hkra hkala ai lam byin ai, nga nna ginra masha ni tsun dan ai.
Gumshem Myen hpyen dap ni gaw, October shata 22 ya shani kaw nna, Lung Ja Bum hte Wa Wang shara de, htu shadut shang wa ai majaw KIA hpyen hpung hte shani shagu ngu na gasat gala majan byin nga ai re.
