KIA Dap Dung 17 ginra hta Myen hpyen hpung hte KIA ni gasat majan byin
Mungmyit Sinli Ga ( Kachin Sub-state ) KIA Dap Ba 10 Dap Dung 17 ginra hta shamu shamawt du nga ai Myen hpyen dap Hk.M.Y 356 hte 419 dap na pawng hpawm hpyen hpung ni hte KIA hpyen hpung ni April shata 27 ya shana daw hkying 1:20pm aten kawn hkying 1:40pm aten du hkra gasat gala majan byin ai lam na chye lu ai.
Myen hpyen hpung ni gaw Ya Yung Bum hte Namhkai maga kawn shamu shamawt lung wa ai ten Ta Lau Shui mare kaw ang katut gap hkat ai re lam, shawng lam na Salang langai shana wa ai.
April shata 25 ya shani hta mung, KIA Dap Ba 4 Dap Dung 8 ginra, Dung Gyeng mare makau Kawng Ai Da Nam kaw Myen hpyen dap Hk.L.Y 69 na hpyen hpung hte KIA ni gap hkat ai re.
Ya aten hta Myen hpyen dap ni KIA Dap Ba 4 hte Dap Ba 10 ginra hta hpyen n gun 100 hku htu da ai lam, shawng lam shi sawk ni kawn chye lu ai.
Myen hpyen dap kawn lai wa sai 2018 ning December shata 21 ya shani hta Sammung hte Jinghpaw na Myen hpyen ginjaw jung ai shara 5 kaw shata 4 jan hpyen shamu shamawt ai lam hpe gan jahkring na matu ndau shabra laika shapraw da ai re.
Ndau shabra laika shapraw da ai raitim, Myen hpyen dap gaw hpyen dap nnan jung jat wa ai lam, KIA ni nga ai shara de hpyen shamu shamawt lam galaw wa ai majaw ya na zawn gasat gala majan byin ai re lam, mungmasa maram masam salang ni tsun ai kawn chye lu ai.
