KIA Dap Dung ( 27 ) ginra hta Myen hpyen ni nbungli bawm wa jahkrat

KIA Dap Ba ( 3 ) Dap Dung ( 12 ) ginra, Je U kaw nga ai Hk.L.Y ( 44 ) Myen hpyen dap ni hpe, December 19 ya shana maga hkying 4:39pm aten hta KIA Dap Dung ( 12 ) hpyen hpung ni sa htim gap ai lam, shawnglam shisawk ni kawn chye lu ai.

Shana maga hkying 4:20pm aten hta gaw, Manmaw maga kawn lung wa ai Jet nbungli langai hte KIA Dap Dung ( 27 ) ginra rai nga ai, Ulang Pa, Bum Chyaw Bum hte Nam Gat Hkaraw mayan ni hta bawm ( 4 ) wa jahkrat bun nna jak sinat hte mung, gap bun ai lam chye lu ai.

KIA Dap Ba ( 2 ) ginra, Deng ( 5 ) kaw dap jung shara jahkrat nga ai Myen hpyen ni, December 19 ya shani hta Awng Lawt mare lung wa lam Deng ( 5 ) hte Deng ( 6 ) lapran na Nam Koi lam hpe nhpan kum pat kau ya ai lam chye lu ai.