KIA Dap Dung (3) ginra shara (4) hta gasat gala majan byin
Sadung Ginwang, Pan Se Ninghtawn KIA Masat (5) Dap Ba, Masat (3) Dap Dung ginra shara (4) kaw KIA hte Myen hpyen hpung ni March shata 21 ya jahpawt hkying 5:05am aten kaw nna hkying 2:00pm aten du hkra gasat gala majan byin ai lam chye lu ai.
Gasat gala majan byin ai shara ni gaw, N-wan Yang kawng, Wuhtau bum, Sadung Byu Ha kawng hte Lagat yang shara ni hta rai nna, Myen hpen dap Hk.M.Y (389), Hk.M.Y (384) pawng hpawm hpyen hpung ni hte re lam, shawng lam na lit nga ai salang langai tsun ai.
Ya aten Myen hpyen dap ni gaw, Manmaw maga kaw nna hpyen modo 10 hta hpyen n gun 100 jan daram the KIA Masat (3) Dap Dung ginra de hpyen shamu shamawt lung wa nga ai majaw, gasat gala majan matut manoi byin wa mai ai lam Salang wa matut tsun ai.
Mungmyit Sinli Ga (Kachin-Sub-state) KIA Dap Ba (4), (6) hte Dap Ba (10) ginra ni hta mung Myen hpyen dap ni matut manoi hpyen shamu shamawt nga ai re. KIA hte Myen hpyen dap ni lai wa sai February shata kaw nna gasat gala majan bai byin wa ai re hpe chye lu ai.
