KIA Dap Dung 34 ginra hta Myen hpyen hpung hte KIA ni gasat gala majan byin
Mungmyit Sinli Ga ( Kachin Sub-state ) KIA Dap Ba 4 Dap Dung 34 ginra, Loimawk mare hte Tungkyi mare lapran na Nhkum mare dingsa maga hku shamu shamawt shang wa ai Myen Dapnu 101 kata na hpyen hpung ni hte KIA hpyen hpung ni May shata praw 8 ya shani ka-ang hkying 12:20pm aten hta gasat gala majan byin ai lam na chye lu ai.
KIA Dap Ba 3 Dap Dung 1, 12, hte 27 ginra ni hta mung, Myen hpyen dap ni gaw hpyen n-gun laknak n-gun hte malu masha ni hpe hpyen modo kaba hte htaw lahka nga ai lam, ginra shi sawk ni kawn chye lu ai.
Myen hpyen awn daju rung kaw nna lai wa sai April shata 30 ya shani hta Jinghpaw Mung hte Sam Mung ginra 5 hta hpyen shamu shamawt lam n-galaw na matu June shata htum hkra shata 2 bai jat dat ai lam ndau laika shapraw da ai re.
Ya na zawn hpyen shamu shamawt lam n-galaw na matu ndau laika shapraw da ai raitim, Myen hpyen hpung ni gaw KIA ni nga ai shara de shamu shamawt shang wa ai majaw gasat gala majan byin ai re lam, hpyen masa maram masam salang ni tsun ai kawn chye lu ai.
