KIA Dap Dung (36) ginra hta gasat gala majan byin
Mungmyit Sinli Ga ( Kachin-Sub-state) Munggu Ginwang, KIA Dap Ba 6, Dap Dung 36 ginra, Hkam Lem Bum marawn kaw September shata 11 ya shani, Myen Hpyen Dapnu 88, 99 na hpyen hpung ni hte MNDAA, AA hpyen hpung ni gasat gala majan byin ai lam, shawng lam na salang langai shana wa ai kaw na chye lu ai.
“Ndai hpyen hpung ni gaw hpu nau Kokang hpyen hpung (MNDAA) hte Rakhine (AA) hpyen hpung ni nga ai shara kaw shawng gap hkat ngut ai hpang KIA Dap Dung 36 hpyen hpung ni mung hkying 2:45pm ten kaw nna minutes 20 daram bai gap ai re” nga nna shawng lam na salang langai tsun dan ai.
Gasat gala majan byin ai shara de Mungbaw, Hugan mare kaw nga ai Myen hpyen hpung ni laknak kaba 105mm kaba ni hte gap bun ai rai nna, Myen hpyen maga n gun 200 daram htu shadut lung wa ai majaw gap hkat ai re lam chye lu ai.
Ya aten du hkra rai yang hpyen n gun bai jat wa ai lam nnga shi ai raitim, ding yang naw maja hkat nga ai re hte hpawt ni hpawt din hkan mung matut nna gasat gala majan byin wa mai ai lam shawng lam na salang langai masam maram tsun dan ai.
Ndai Myen hpyen Dapnu 88 kata na hpyen hpung ni hte September praw 2 ya shani hta mung KIA hpyen hpung hte gasat gala majan byin ai re hpe mung chye lu ai.
