KIA Dap Dung 44 ginra hta Myen hpyen hpung hte KIA ni num daw 3 lang gasat gala majan byin
KIA Dap Ba 9 Dap Dung 44 ginra de shamu shamawt shang wa ai Myen hpyen dap Dapnu 33 kata na hpyen hpung ni hte KIA Dap Dung 44 kung 5 na hpyen hpung ni, June shata praw 6 ya jahpawt hkying 8:10am aten hta numdaw mi, hkying 9:00 jan hta numdaw 2 lang dai hpang hkying 10:00am jan hta numdaw 3 lang gasat gala majan byin ai lam chye lu ai.
“Myen hpyen dap ni gaw, Hk.L.Y 41, Hk.M.Y 11, Hk.M.Y 12, hte Hk.M.Y 119 dap na pawng hpawm n gun 80 daram re lam maram lu ai. Anhte kung 5 ni shara jahkrat tawn ai Hkachin Bum post de shang wa ai majaw gap hkat ai re” Nga nna Ka Mai Ginwang na lit nga ai Salang langai shana wa ai.
Gasat gala majan byin ai shara de, Gumtsai Zup mare kaw nga ai Myen hpyen hpung ni 60mm sinat kaba hte 3 lang gap bun ai, dai hpang Nam Jan Hku de nga ai Hk.L.Y 11 ni mung, 82mm sinat kaba hte 15 lang gap bun ai lam chye lu ai.
Myen hpyen dap ni gaw gasat gala majan byin ai makau Sabaw Maw maga de hpyen n gun bai jat nga ai lam, ginra shi sawk ni kawn chye lu ai.
Lai wa sai April shata 30 ya shani hta Myen hpyen dap a ginjaw rung kaw nna Sammung hte Jinghpaw Mung ginra 5 kaw shata 2 tup hpyen shamu shamaawt lam n galaw na matu, ndau laika shapraw da ai raitim, Myen hpyen dap ni gaw KIA ni shara jahkrat nga ai ginra de hpyen shamu shamawt sa wa ai majaw gasat gala majan 4 lang byin sai re hpe chye lu ai.
