KIA Dap Dung ( 5 ) ginra hta gasat gala majan byin
KIA Dap Ba ( 8 ) Dap Dung ( 5 ) ginra, Ga Hkyeng Bum Ginwang Daw, Kawng Ja Ninghtawn kata hta shamu shamawt nga ai Myen Dapnu ( 33, 101 ) kata na pawng hpawm hpyen hpung ni gaw, KIA hpyen hpung ni shara la nga ai Mali Yang mare makau na La Mai Yang post de htu shadut lung wa ai majaw, October shata 19 ya jahpawt hkying 4:30am kawn hkying 5:00am aten laman gasat gala majan byin ai lam, shawng lam shi sawk ni kawn chye lu ai.
October shata 11 ya shani kaw nna, KIA Dap Ba ( 8 ) Dap Dung ( 5 ) ginra, Mungnyang Ginwang, Sinbu Ninghtawn, Hkawng Me mare makau kaw mung, KIA Dap Dung ( 5 ) hpyen hpung hte Myen Dapnu ( 101 ) kata na hpyen hpung ni gasat gala majan byin ai re.
Myen hpyen dap ni gaw, hpyen n-gun law law hte KIA ni nga ai shara de htu shadut lung wa nga ai re majaw gasat gala majan gaw, matut byin wa mai ai lam, ginra shi sawk ni kawn chye lu ai.
KIA Dap Ba ( 3 ) Dap Dung ( 1 ) ginra, Manmaw Ginwang, Wa Baw mare baw bum, Sharaw Gan Kap Kawng kaw shara la nga ai Hk.L.Y ( 47 ) dap na Captain Win Bo woi awn ai hpyen hpung ni mung, October shata 19 ya shani Man Yawt mare hte Man Sai mare lapran kaw sin hkap nna lai wa lai sa, mungmasha ni hpe sawk jep nga ai lam chye lu ai.
