KIA Dap Dung ( 7 ) hte Dung ( 20 ) ginra hta majan byin
KIA Dap Ba ( 1 ) Dap Dung ( 7 ) hpyen hpung ni shara jahkrat nga ai, shawnglam Shing Kap Bum Post maga de, Myen hpyen dap, Hk.L.Y ( 46 ) hpyen hpung ni htu shadut lung wa ai majaw, December praw 7 ya shana maga hkying 3:15pm aten hta KIA hpyen hpung ni hkap shingla gasat dat ai kawn majan byin ai lam, shawnglam shisawk ni kawn chye lu ai.
KIA Dap Ba ( 2 ) Dap Dung ( 20 ) hpyen hpung ni nga ai, Nawng Hkam Bum maga de, Myen hpyen hpung ni shamu shamawt lung wa ai hpe KIA hpyen hpung ni, bawm hte hkap shingla dem bun ai. Dai hpang Myen hpyen hpung ni gaw, sinat hkrup mara gap dumbre ai majaw, Hpakant maga kawn yu wa ai Jinghpaw la langai a pai lata kaw pala dingtset hkra mat ai lam chye lu ai.
Dai ni hkying 1:30pm aten hta mung, Lawa, Gumtsai Yang mare baw kanoi sun kaw du shang nga ai Myen hpyen hpung ni hpe, KIA Dap Dung ( 20 ) hpyen hpung ni sa htim gap dat ai kawn majan byin ai lam, ginra shisawk ni shana wa ai.
Ya aten Myen hpyen hpung ni gaw, Lawa mare kaw na Gumtsai Yang lung wa ai lam ding yang naw nga nga ai lam matut chye lu ai.
