KIA Dap Dung (9) Kung (2) ni hte Myen hpyen hpung ni gasat gala majan matut byin
Mungmyit Sinli Ga, (Kachin Sub-state) KIA Dap Ba (6) Dap Dung (9) Kung (2) hpyen hpung ni shara la nga ai Bak Noi dingsa kaw September shata praw 5 ya, dai hpawt hkying 6:30pm aten hta KIA hte Myen hpyen hpung ni gasat gala majan byin ai lam na chye lu ai.
Myen Hpyen Dap, Dapnu (88) kata na hpyen n-gun 80 daram gaw, KIA kung (2) hpyen hpung ni shara la nga ai Bak Noi dingsa de htu shadut lung wa ai majaw, gasat poi byin ai re, ya na hku sha rai yang majan gaw naw byin wa na masa nga ai lam, shawng lam na salang langai shana wa ai kawn chye lu ai.
Gasat gala byin ai makau grup yin shara ni hta Myen hpyen dap ni gaw, hpyen n-gun matut jat nga ai hta Dima mare kaw mung, hpyen mawdaw kaba 2 hte hpyenla wa htaw bang da ai lam, ginra shi sawk ni shana wa ai.
Ndai Myen Hpyen Dapnu (88) ni hte sha, KIA hpyen hpung ni September shata praw 2 ya shana de, Nam Mye Pa kadawng kaw gasat gala majan byin ai re hpe mung chye lu ai.
