KIA Dap Dung ginra hta gumshem Myen hpyen ni hte KIA,KPDF pawng hpawm hpyen hpung ni gasat gala majan byin
Hpakant KIA Masat (9) Dap Ba, Masat (6) Dap Dung ginra, Maden Yang mare kaw, December shata praw 6 ya shana hkying 4:00pm aten kaw nna gumshem Myen hpyen hpung ni hte KIA, KPDF pawng hpawm hpyen hpung ni gasat gala majan byin ai lam chye lu ai.
Gumshem Myen hpyen hpung ni gaw, Maden Yang mare hpung gyi jawng kaw shara jahkrat nga ai hpe, KIA, KPDF pawng hpawm hpung ni sa htim gap gasat ai kawn gasat poi byin ai re lam, shawng lam shiga lawk kaw na chye lu ai.
Hpakant Byuha kawng hte Mazup Yang htawng kaw dap shara jahkrat nga ai gumshem Myen hpyen ni laknak kaba hkrup mara gap shadam ai majaw, Nam Hpyit mare na lusha seng langai kaw wa hkrat kapaw nna modo 2 hte dum nta hten mat ai lam chye lu ai.
Dai ni December shata praw 7 ya shani hta mung, Maden Yang hpung gyi jawng wang kaw dap shara jahkrat nga ai gumshem Myen hpyen hpung ni hpe KIA, PDF pawng hpawm hpyen hpung ni numdaw kalang bai sa htim gap gasat ai hta tai hpyen wa a, sinat machyu pala hte arung arai nkau zingla lu ai lam chye lu ai.
