KIA ginra hta gasat gala majan grau sawng wa
KIA Dap Nawng Dap Dung ( 252 ) ginra, Gidon KIA Post hpe October, 7 ya jahpawt hkying 8:50am aten kaw nna Myen hpyen dap ni Jet fighter nbungli ( 4 ) hte wa gap bun nhtawm sinat kaji kaba hte htu shadut htim gasat ai lam chye lu ai.
October, 6 ya ja hpawt hkying 3:00am aten hta mung Nhkram Jawng Kawng kaw du nga ai Myen hpyen hpung ni Gidon Post maga de 81MM gap bun ai lam chye lu ai. Bai, Ja Pu mayan hta mung Nhkram maga de
hpyen n-gun jat lung wa ai Myen Hhpyen hpung ni hte gasat gala majan byin ai lam chye lu ai.
October, praw 6 ya shani hta sha KIA Dap Ba ( 2 ), Dap Dung ( 6 ) ginra de shamu shamawt hkawm nga ai Myen hpyen dap Hk.M.Y ( 424 ), ( 425 ) kata na hpyen hpung ni hte KIA hpyen hpung ni Seng Hpra hte Gaw Lu Yang lapran kaw kalang, Ma U Pin mayan kaw kalang gasat gala majan byin ai lam chye lu ai.
October, 7 ya jahpawt hkying 5:00am aten hta mung Ka Mai kaw nna pru wa ai Myen hpyen hpung ni hte KIA hpyen hpung ni Kamai Gauri, Ga Matep kaw gasat gala majan byin ai lam chye lu ai.
KIA Dap Ba ( 3 ), Dap Dung ( 1 ) ginra hta mung October, 7 ya shani hkying 9:45 aten hta Kaihtik kaw du nga ai Myen hpyen hpung ni Ura Bum maga de 120MM hte gap bun ai lam chye lu ai.
Wunpawng mungshawa ni October, 6 ya shani Myitkyina muklum hta hpyen majan hpe ninghkap shawa n-gun madun ai lam galaw raitim Myen hpyen dap gaw majan jahkring ai lam n nga ai sha grau grau nna KIA shawng lam ginra ni de hpyen n-gun jat nna htu shadut htim gasat nga ding yang re hpe chye lu ai.
